Naroa Agirre pilotari zestoarrak, Iera Iturriagarekin bikotea osatuta, Udara Caixabank binakako pilota txapelketa irabazi du. Aranburu eta Mujika bikoteari 22 eta 16 irabazita jantzi dute txapela, gaur Iruñeko Labriten.
Ados Pilotak antolatutako txapelketa izan da Udara Caixabank, eta udan hamalau leku desberdinetan jokatu dituzte partidak. Txapelketan sei bikotek parte hartu dute, eta bikote guztiek denen aurka jokatu behar izan dute. Iturriagak eta Agirrek jokatutako sei partidak irabazi dituzte, eta hala lortu dute txapeldunak izatea.