Ordu gutxi baino ez dira falta 23. Korrikari hasiera emateko. Bihar bertan hasiko da Irunen (Gipuzkoa) eta Baionan amaituko da. Zestoara martxoaren 20ko goizaldean iritsiko da euskararen aldeko lasterketa, 04:00ak inguruan, baina aurrez, Korrika Txikiak egingo dituzte herriko zenbait auzotan.
Bihar, osteguna, egingo dute Korrika Txikia Aizarnan, 15:00etan hasita. Arroabean, berriz, ostiralerako antolatu dute Korrika eguna. Arratsalde hasieran ikastetxeko haurrek hasiko dute festa, eta Korrika Txikia egingo dute auzoko kaleetan zehar. 17:00etan Korrikaren inguruko jolas eta eskulanak egiteko aukera izango dute Barbantxo aisialdi taldearen eskutik, eta amaitzeko, Ederki elkartekoek antolatutako talo jana egingo dute 18:30ean.
Zestoan datorren asteartean, martxoaren 19an, egingo dute Korrika Txikia, 15:30ean abiatuta.