Ainhoa Urteaga zumaiarra zuzenean aritu zen atzo arratsaldean Arranoko terrazan, iazko azaroan argitaratutako Arrakalak bere bakarkako lehen lana aurkezten. Ez zen bakarka aritu, ordea. Taldean agertu zen, eta oholtza gaineko kideetako bat Aitor Amilibia gitarrista izan zuen.
Atzokoa, gainera, emanaldi berezia izan zen, udako Arranopolako azken kontzertu saioa izan zelako. Jende ugari bertaratu zen, azken bi hilabeteetako ostegun oro bezala, eta Urteagak doinu ederrez ondutako abestiak jo zituen, teklatuarekin lagunduta.