Zarauzko Aritzbatalde pilotalekuak pilotari profesionalen lehen hitzordua hartu du gaur, eta Masters CaixaBank esku pilota txapelketako lehen bi neurketak jokatu dituzte, 17:15ean hasita.
Gaurko lehen partidan, B seriekoan, Salaberriak eta Morgaetxeberriak Zubizarreta IV.a eta Bikuña izan dituzte aurrez aurre. 7-22 izan da norgehiagokaren emaitza, eta Zubizarreta IV.a eta Bikuña nagusitu dira.
Bigarren norgehiagokan, A seriekoan, Artolak eta Rezustak Laso eta Martijaren aurka neurtu dituzte indarrak. 20-22 amaitu da partida, eta Laso eta Martija izan dira garaile.
Gaurko bi partiden ostean, abuztuaren 23an izango da bigarren hitzordua Aritzbatalden. B serieko neurketan, Amianok eta Gabirondok Zubizarreta IV.aren eta Bikuñaren aurka jokatuko dute; bigarren partidan, berriz, A seriean, Altuna III.a eta Imaz Laso eta Martijaren aurka ariko dira.
Bigarren hitzorduko sarrerak salgai daude Interneten: 45 euro ordaindu beharko dira kantxako sarrerak, eta 30 euro, errebotekoak.