Bi setetan irabazi ostean, Aldabek eta Barrenetxea IV.ak Jai Alai Zarautz erremonte txapelketako garaipena lortu zuten atzo arratsaldean jokatutako jardunaldian. Lekunberrikoak eta Hernanikoak erraztasunez irabazi zieten Segurola eta Juaneneari (15-7 eta 15-9), eta ondorioz, txapela buruan jantzita amaitu zuten joan den ostiralean hasitako kirol hitzordua.
Aldabek zazpina tanto egin zituen bi setetan, eta Barrenetxeak beste launa. Juaneneak, hurrenez hurren, bi eta bost tanto erdietsi zituen, baina bere kantxako bikotea, Segurola, ez zen hain fin ibili. Lehen setean ia hasiera hasieratik nagusitu ziren urdinak, launa puntuko berdinketaren ondoren, eta bigarrengoan ere egoera berdintsua gertatu zen. 5-5eko markagailuaren ondoren, urdinak 7-10 eta 8-12 aurreatu ziren, 9-15eko markagailuarekin txapeldunak bihurtu ziren arte.
B mailan, Deskarga eta Eskudero irabazle
Lehen mailako partidan bezala, Deskargak eta Eskuderok aise irabazi zieten Aiestaran VII.ari eta Ugarteri (15-8 eta 15-9). Eskudero Ugarte baino askoz gehiago izan zen kantxan, azken horrek ohikoak baino akats gehiago egin baizituen. Aiestaranek sei tanto egin zituen, bikote urdinaren erasorako ekarpena, oro har, urria izan bazen ere. Eskuderok bederatzi tanto egin zituen partida osoan, eta Deskargak hamar. Biek maila bikaina eman zuten: atzean sendo aritu ziren eta aurrean ere eraginkorragoak izan ziren.
(Argazkiak: Oriamendi)