Jai Alai Zarautz erremonte txapelketako bigarren eta azken finalerdiak jokatu zituzten atzo arratsaldean Aritzbatalden. Finaletarako azken txartelak banatzeko neurketetan, Segurola-Juanenea eta Aiestaran VII.a-Ugarte II.a bikoteak gailendu ziren.
Txapelketa nagusiari dagokionez, Segurolak eta Juaneneak Ezkurra II.aren eta Larrañagaren aurka 2-1 irabazi zuten (15-9, 9-15 eta 8-2) atzo. Erremonte oneko finalerdia izan zen. Lehen setean, Segurolak eta Juaneneak 15-9 irabazi zuten atzelariaren lan onari esker. Larrañagak ezin izan zuen ezer egin.
Bigarren setean, Ezkurra II.a izan zen onena. Larrañagak bost tanto egin zituen saketik, eta Ezkurra II.ak sei. Partida berdindu zuten horri esker, baina hirugarren setean Juanenea izan zen protagonista nagusia, zazpi tantorekin. Segurolarekin batera lan eginda, 8-2 irabazi zuten azken set hori. Borrokatu egin zuten, eta, gainera, ondo aritu ziren tantoen amaieran.
Hori horrela, Segurola eta Juanenea bikoteak Aldabe eta Barrenetxea IV.a bikotearen aurka neurtuko dituzte indarrak gaurko finalean.
B multzoko finalerdian, Aiestaran VII.ak eta Ugartek aise irabazi zuten. Ugartek babes handia izan zuen harmailetan, eta Aiestaran VII.ak airean eraman zuen. Zortzi tanto egin zituen lehen setean, eta hamar bigarrenean, finalerdia erabat ebatziz.
Hala, B multzoko finalean, Aiestaran VII.a eta Ugarte Deskargaren eta Eskuderoren aurka ariko dira.
18:30ean hasiko da erremonte txapelketako azken jardunaldia gaur Aritzbatalden, eta txapelketa lehen aldiz emango dute telebistan, ETB1en. Dena den, emisioa igande iluntzean izango da.