Boga telesaila filmatzen ari dira Bizkaiko eta Arabako hainbat txokotan, eta Iraia Elias izango da euskarazko thriller berriaren protagonistetako bat. Zarauztarrak Mikel Niso, Mikel Kaye, Iker Roca, Markel Sainz, Ander Martinez eta Mikel Losada aktoreekin partekatuko du pantaila.
Mikel Santiago idazleak idatzi du Primeran plataformarako sortutako telesaila, Txemi Parrarekin batera, eta Mikel Ruedak zuzenduko ditu sei atalak. Telesailak bost arraunlariren istorioa kontatuko du. Gazteak bizitzako traineru txapelketa garrantzitsueneko finalerako sailkatu berri direla ospatzen ari diren bitartean, gazte bat harrapatuko dute istripuz. Hildakoaren gorpua hondoratu egingo dute, eta ezer ez esatea adostuko dute. Hori horrela, Ertzaintza desagerpena ikertzen hasiko da.