Alokairura bideratuko dituzten Salberdingo 91 etxebizitza babestuen obrak bisitatu dituzte gaur goizean Eusko Jaurlaritzako eta Zarauzko Udaleko ordezkariek, Denis Itxaso Etxebizitza eta Hiri Agendako sailburua eta Xabier Txurruka alkatea buru zirela. Lanak aurreratuta daude, eta etxebizitzak 2027ko urtarrilean entregatuta egotea aurreikusten dute. Bizitoki horiek esleitzeko prozesua errekurtso fasean dago une honetan eta pertsona onuradunen zerrenda uda ondoren argitaratzeko asmoa dute; izena emateako epea martxoaren 2tik 20ra bitartean egon zen zabalik.
Bizkaia kaleko 34 eta 36 zenbakietan Visesak sustatuta ari dira eraikitzen 91 etxebizitzak, eta horiek zortzi solairutan banatuta daude. Horietatik zazpi gela bakarrekoak izango dira –45 metro koadroko azalera erabilgarria izango dute–; 75 bi gelakoak –65 metro koadroko azalera erabilgarridunak–, horietako bi mugikortasun urriko pertsonentzat egokituak; eta bederatzi hiru gelakoak –85 metro koadroko azalera erabilgarriarekin–. Alokaruko etxebizitza sustapen horretarako 19.977.754,07 euroko inbertsioa egin du Jaurlaritzak, eta aurrekontuaren %20 –3.997.584 euro– Next Generation Europako funtsetatik jaso dute.
"Eraikina erabat integratuta geratu da Salberdin auzoan, eta eskertzekoa da Jaurlaritzak egin duen lana", nabarmendu du Txurrukak: "Datorren urte hasierarako 1.100 bizikidetza unitate gauzatuko dira, eta hori lortzeko lana asko egin da azken hamarkadan, bai lankidetza publiko-pribatuan, bai lankidetza publikoan, udalaren eta jaularitzaren artean". Ildo beretik jo du Itxasok, eta Zarauzko Udalaren borondatea aitortu du: "Honek erakusten du nahi denean etxebizitzaren arazoari aurre egin dakiokeela". Era berean, gogora ekarri du Visesaren datorren urteko plangintzan 200dik gora etxebizitza eraki nahi dituztela Iritan, eta horretarako hitzarmen bat sinatuko dutela laster. "Guztira, 456 etxebizitza babestu sustatzen ari gara Zarauzko auzo ezberdinetan".
Etxebizitza sailburuarekin eta Zarauzko alkatearekin batera, Hirigintza zinegotzi Garbiñe Oiarbide, Visesako zuzendari nagusi Carlos Quindos eta proiektua aurrera eraman duten Cooperativa Arquitectura SCP eta Amenabar Eraikuntzak enpresetako ordezkariak izan dira goizeko bisitaldian.
