Langileen akordioa berritzeko negoziaketak etenda daudela ikusita, ELA sindikatuak jakinarazi du hiru greba egun deitu dituztela Zarauzko IAT zentroan. Hain justu, astelehenean izango da lehen protesta eguna lantokian, 08:00etan, eta beste biak uztailaren 8an eta 10ean izango dira. Itasua enpresak kudeatzen du lantegia, Bergarakoarekin (Gipuzkoa) batera, eta bertan ere bat egingo dute deialdiarekin.
Sindikatuaren arabera, langileek enpresarekin izandako azken negoziaketek "hobekuntza gutxi" ekartzeaz gainera, "atzerapenak" ekarri dituzte. Langileen batzordeak enpresarekin sei bilera egin dituela jakinarazi du, eta horien ostean "ez da aurrerapausorik eman". Hori horrela, langile batzordeak enpresa komiteak proposatutakoa babestu du, eta hiru greba egun deitu dituzte. Izan ere, sindikatuak "garbi" du langileen baldintzak hobetu behar direla, "eta enpresak badu horretarako gaitasuna".
ELAren arabera, inguruko herrietan funtzio berdinak betetzen dituen konpetentzia den enpresako langileek dauzkaten lan baldintzetatik "oso urruti" daude Itasuako langileak. Horrenbestez, negoziaketa honetan "baldintzak parekatzea" da langileek lortu nahi dutena.