Aurreikuspenek zioten moduan, egunak goibel argitu du gaurkoan Zarautzen. Hori ez da oztopo izan, ordea, 46. Bikote Mistoen Krosa jokatzea helburu zuten 644 bikoteentzat. Zarautz Rugby Taldeak antolatuta, 11:00etan hasi dute proba Aritzbatalde kiroldegiaren aurrealdean, baina orduerdi lehenago korrikalariz bete da Araba Kale ingurua. Beroketa lanetan ikus zitezkeen parte hartzaileak, lesioak ekiditeko ez ezik, hotzari aurre egiteko helburuarekin.
Azkenean ateri eutsio dio eguraldiak proban zehar, hasieran kenduta; izan ere, zaparradatxoa bota du epaileak irteera keinua eman duenean. Ohi bezala, herriko kaleak zeharkatuz osatu dute 7,9 kilometroko proba kirolariek, eta publikoak ere ez du hutsik egin; ibilbide osoan zehar ez da animaziorik falta izan. Lege Zaharren Enparantzan amaitu da lasterketa, eta bertara heltzen lehen bikotea June Agirrezabalaga eta Aritz Arregi zarauztarrek osatutakoa izan da; horiek 29 minutu eta 4 segundo behar izan dituzte proba burutzeko. Haien atzetik heldu dira Paulo eta Helene Alberdi anai-arrebak (29:21), eta hirugarren postua Iñaki eta Nerea Muruak, hauek ere anai-arrebak, eskuratu dute (29:24).
Lasterketako garaipena eskuratzeaz gain, Agirrezabalaga eta Arregi izan dira zarauztar bizkorrenak. Herriko bigarren sailkatuak Iker Markez eta Sandra Rodriguez izan dira, eta hirugarrenak Xabier Aranburu eta Laura Arregi.
Sailkapen osoa hemen ikus daiteke.