Euskararen Eguna da abenduaren 3a, eta ospakizun horren harira, Zarauzko Udalak bideo eta pegatina lehiaketa antolatu du beste urte batez, herriko ikastetxeekin lankidetzan. Ostiral eguerdian banatu zituzten sariak, Etxezabala aretoan.
Pegatina lehiaketari dagokionez, Inge Azpiarterentzat izan zen lehen saria (100 euroko txartela Zarauzko dendetan gastatzeko). Bigarren saria Maialen Arizmendik eskuratu zuen (80 euroko txartela Zarauzko dendetan gastatzeko), eta hirugarrena, aldiz, Beñat Eizagirrek (50 euroko txartela Zarauzko dendetan gastatzeko).
Bideorik onenaren saria Lur Elorrietak, Intza Subijanak eta Irati Rezabalek osatutako taldearentzat izan zen (200 euroko txartela Zarauzko dendetan gastatzeko). Bigarren saria Irati Malok eta Aiuri Alberdik egindako bideoarentzat izan zen (150 euroko txartela Zarauzko dendetan gastatzeko), eta hirugarren postua Maylin Pichardok, Maite Erostarbek, Alex Zubielquik eta Edu Ruizek eraman zuten (100 euroko txartela Zarauzko dendetan gastatzeko).
Dena prest Euskararen Egunerako
Zarauzko Udalak jakitera eman du aurtengo Euskararen Eguneko jardueren programa. Urtero bezala, egitaraua bi zatitan banatu dute: alde batetik, Zarauzko ikastetxeetako ikasleentzat prestaturiko ekintzak eta, bestetik, herritarrei zuzendutako jarduerak.
Aurten guztira 2.000 ikasle inguruk parte hartuko dute Euskararen Egunerako antolaturiko ekintzetan, hala nola, antzerki emanaldietan, beldurrezko ipuinen kontaketetan edota pegatina eta bideo lehiaketan.
Herritar guztiei zuzendutako ekintzak ere izango dira datozen egunetan. Asteburu honetako kirol partidetan, esaterako, euskararen aldeko argazkiak atera dituzte, Euskaraz bizi nahi dut eta Zarautzen euskaraz bizi nahi dugu dioten pankartekin. Hori ez ezik, gaur jokatu den Bikote Mistoen Kroseko kamisetetan euskararen aldeko mezua txertatu du udalak, Egiten duguna gara. Zarautzen kirola euskaraz lelopean.
Datorren asteari begira, Zuhaitz Gurrutxagaren Nortasun agiria antzezlana taularatuko dute, hain zuzen, abenduaren 5ean. Hilaren 7an, aldiz, erromeria izano da Eingo taldearen eskutik, 18:00etan hasita, Musika Plazan.