Inauterietako konpartsaren izen ematea martxan jarri ondoren, Zarauzko Udalak, Jaiak eta Ekitaldietako departamentuaren bitartez, eta Euskalduna tabernak elkarlanean, Inauterietako kartela osatzeko lehiaketa jarri dute martxan.
Kartel lehiaketan parte hartzeko Euskalduna Tabernan edo Turismo Bulegoan aurkeztu beharko dira lanak oinarrietan zehaztutako formatuan. Urtarrilaren 9a izango da azken eguna eta hiru sari emango dituzte: lehenengo saria (500 euro), bigarren saria (300 euro) eta publikoaren saria (afaria bi pertsonentzat). Nabarmentzekoa da aurten lehen eta bigarren sarien zenbatekoa igo dela, parte-hartzea sustatzeko helburuarekin.
Publikoaren sariko bozketa Zarauzko Turismo Bulegoaren Facebookean egingo da urtarrilaren 12tik 16ra. Informazio gehiago eskuratzeko, Jaiak eta Ekitaldietako sailarekin harremanetan jarri daiteke 943-00 51 19 zenbakira deituta edota jaiak@zarautz.eus helbidera idatzita.