Mugikortasuna, errespetua eta bizikidetza kontzientziazio eta sentsibilizazio kanpaina abiatu zuen Zarauzko Udalak hilaren hasieran. Bizikletan segurtasun elementuak eramateko garrantziaz kontzientziatu nahi zituzten herritarrak, eta, zehazki, argien derrigorrezko erabileraren berri eman.
Horregatik, asteotan kontrolak egin ditu Udaltzaingoak, bizikleta gehien ibili ohi diren Zarauzko kaleetan. Hain justu, kontrol horietako emaitzak ezagutarazi ditu erakundeak: 360 txirrindularitik gora gelditu dituzte Udaltzainek, argirik ez eramateagatik. Horren aurrean, udalak gogorarazi du urte guztian zehar eraman behar direla argiak, "baina are gehiago hilabete hauetan, eguneko argi orduak murrizten baitira".
Azterketa honekin amaitutzat eman dute kanpainaren lehen fasea, eta aste honetan ekin diote bigarrenari: udalak ohartarazi du aurrerantzean bizikletan argirik eramaten ez duten herritarrek isuna jasoko dutela.