Gazatarrei laguntza humanitarioa emateko helburuarekin, Global Sumud ontzidia bihar aterako da Palestinarantz hainbat herrialdetako portuetatik, tartean Kataluniatik, Tuneztik eta Italiatik. Egitasmo horri laguntzeko, bere alea jarri nahi du Zarautz-Palestina taldeak, eta hala, iragarri du mahaia jarriko duela bihar 12:30etik 13:30era udaletxe aurreko plazan. Musikarik eta aldarririk ez dela faltako aurreratu du, eta 13:00etan ekitaldi txiki bat egingo dutela.
Palestinar herriari elkartasuna erakusteko eta Israel egiten ari den genozidioa salatzeko hainbat ekintza egin ditu udan zehar Zarautz-Palestinak, azkena abuztuaren 23an. Malekoia eta hondartza zeharkatu zituzten dozenaka herritarrek manifestazioan.
