Ohikoa den moduan, aurten ere Euskaraz Bizi eguna ospatuko dute Euskal Astearen aurreko larunbatean. Hilaren 6an izango da, eta Bazion Ze Muitua herri mugimenduak dagoeneko jakinarazi du egitaraua. Gainera, ironia puntu batekin egin du; izan ere, erderaz argitaratu du kartela, Live euskara day izenburupean.
Hala, AEK-k antolatuta, euskararen alde korrika egiten abiatuko dute eguna, eta parte hartu nahi dutenek egun horretan, 10:15ean, eman beharko dute izena. Arratsaldea zein iluntzea musikak girotuta egongo dira. Arratsaldean, Matraka elektrotxarangak herriko kaleak zeharkatuko ditu, eta gauean Labar talde donostiarraren kontzertua izango da, txosnagunean.
Aurretik, eguerdian, herri bazkaria ere egingo dute, eta txartelak ostiral honetan eskuratu ahal izango dira. Musika Plazan jarriko dute salmenta mahaia, 18:30etik aurrera. Antolatzaileek jakitera eman dutenez, helduek 15 euro ordaindu beharko dute txartel bakoitza, eta haurrek 8.
Egitaraua:
Irailak 6, larunbata
- 11:00. Euskararen aldeko herri lasterketa AEK-k antolatuta.
- 14:30. Euskararen aldeko herri bazkaria.
- 18:00. Matraka elektrotxarangaren saioa.
- 20:00. Txosnen irekiera.
- 22:30. Labar taldearen kontzertua.