Ateri eutsi dio eguraldiak goizean, eta jendetza gerturatu da Zarauzko hondartzara, 80. Hondartzako Futbol Txapelketako finalak bertatik bertara ikustera. Ikusmina eta giro ederra nagusitu da goizean goizetik, eta 9:00etarako hasi dituzte azken jardunaldiko partidak senior mailako gizonezkoek eta emakumezkoek nahiz eskola kiroleko ikasleek.
Ligan, Kebidek taldea eta Orbela taberna neurtu dira aurrez aurre, eta Kebidekek aise eskuratu du garaipena, markagailua 5 eta 1 utzita. Lehia estuagoa izan da senior mutiletan: Asti Pinturak eta Balearri-Astillero taldeak bana berdindu ondoren, penaltietan irabazi dute zarauztarrek liga.
Kosta Hortz Klinikaren eta Latz Tabernaren arteko norgehiagoka ere penaltietan erabaki da, launa berdindu ondoren. Azkoitiarrek erdietsi dute azkenean garaipena, eta gogotik ospatu dute, bainua hartu eta bandera horia astinduta. Emakumezkoetan, Itxas Lur jatetxeari eman diote kopa, Shelter-Pukasi 4 eta 0 irabazi ondoren.
Partidak amaitu bezain laster eman diote hasiera sari banaketa ekitaldiari, eta bertan izan dira Xabier Txurruka alkateaz eta Inaxio Illarramendi Kirol zinegotziaz gain, Xabier Prieto futbol jokalari ohia eta Jose Angel Iribar entrenatzaile ohia ere.
Ikasleak ere bai
Lehen Hezkuntzako 5. eta 6. mailako haurrak ere aritu dira eskola kiroleko finalak jokatzen. Besteak beste, Antoniano ikastetxeko, Orokieta Herri Eskolako, La Salle Ikastetxeko, Salbatore Mitxelena Ikastolako, Orioko Herri Ikastolako, Zaragueta Herri Eskolako eta Lardizabal Herri Eskolako neskak eta mutilak aritu dira. Horiek otsailaren 1ean hasi zuten hondartzako futbol txapelketa, eta gaur amaitu, seniorrekin batera.