Ibaien Aldeko Ekintzen Nazioarteko Egunari lotuta, Igerain erreka garbitzera joateko deia egin du Eraztun Berde Urdinak. Asmoa da taldean elkartu eta errekan pilatutako zaborra jasotzea, Crocosmia x crocosmiiflora bezalako landare exotiko inbaditzaileak kentzea eta hainbat zuhaitz landatzea.
Eraztun Berde Urdineko zinegotzi Gloria Vazquezek ibaiak zaintzearen garrantzian egin du azpimarra, "biodibertsitatez betetako ekosistemak izateaz gain, gure planetako ur-iturri nagusia baitira". Berak zehaztu duen moduan, jardueraren xedeen artean dago "herritarrak errekak zaintzearen eta babestearen garrantziaz kontzientziatzea". Eraztun Berde Urdinak Igerain, Olaa eta Iñurritza ibaiak barne hartzen ditu, eta guztiak "beren egoera naturalean mantendu" nahi dituztela gehitu du Vazquezek.
Hori hala, igandean, Zarauzko anbulatorioaren aurrean elkartuko da taldea, 10:00etan. Antolatzaileek zehaztu dute parte hartu nahi duen orok izena eman beharko duela aurretik, zarautz@eraztunberdeurdina.eus helbidera idatzita edota 943-00 51 59 zenbakira deituta.