Beste urte batez, Martxoaren 8ko aldarriak ozen entzungo dira larunbatean Zarauzko kaleetan. Zarauzko Koordinadora Feministak eta Itaiak Emakumeen Nazioarteko Egunari lotutako ekitaldien berri eman dute: larunbat osorako egitaraua prestatu du lehenak, eta iluntzerako mobilizazioa deitu du bigarrenak.
Hori hala, Zarauzko Koordinadora Feministak manifestazioa egingo du larunbatean, 12:30ean, Lege Zaharren Enparantzatik hasita. Ondoren, 14:30ean, bazkari feminista egingo dute Arranon, eta 16:30ean Patiyoko Atzuen eskutik zuzeneko irratsaioa izango da Musika Plazan. 18:00etan, kalejira egingo dute Musika Plazatik hasita, eta 23:00etatik aurrera Pintxada Kolektiboa egingo dute Arranon, egunari amaiera emanaz.
Itaiak, berriz, Matxismoaren aurrean emakume langileok borrokara lelopean mobilizatzera deitu ditu herritarrak. Larunbatean 19:00etan jarri dute hitzordua, Lege Zaharren Enparantzan.
