Maitasun kantuz osatutako emanaldia prestatu du Zarautz Abesbatzak ostiral honetarako. 20:00etan hasiko da Maitasun Kontzertua, Merkatu plazako lehen solairuan, eta bertaratzen direnek makina bat abesti entzun ahal izango dituzte, euskaraz zein beste hainbat hizkuntzatan.
Aurtengoan, bi kantu berri abestuko dituzte: bata, Lope de Vegak Araban jaso eta 1618. urtean idatzitako Los Ramilletes de Madrid lanean euskaraz azaldu zuen Zure begi ederrok, ene laztana, katibaturik nabe, librea nintzana bertsoa. Bestea, Anje Duhalderen Maitasun Aroa.