DJa, musikaria, baxu jotzailea, ekoizlea, kontzertu antolatzailea eta irrati esataria da Mikel Unzurrunzaga Schmitz Makala (Zarautz, 1970). Melomano eta sortzaile aktiboa da, ezbairik gabe. Etxeko ganbara musikaren laborategi bihurtua du: ehunka LP eta EP binilorekin, beste horrenbeste CDrekin, diskoak pintxatzeko bi gailu, gitarra eta baxuak, Vox anplifikadorea eta ordenagailua.
Hiru hamarkada baino gehiago daramatza musikari lotutako proiektuetan murgilduta: funk doinuen aurretik, punk suminduak lantzen; Arraio Irratiaren abiatzetik Gazteako Boom Shaka Laka irratsaiora arte; herriko tabernetan aritzen zen DJ xumea, nazioartera zabaldu zena. Orain, Arima Soul taldearekin dabil gustura, eta udaberrian bigarren diskoa argitaratuko dute.