Abuztuaren 10a da gaur, San Lorente eguna, eta izen horixe duen Zestoako eta Zumaiako auzoko ermitaren atarian festa giroa izan da nagusi goiz eta eguerdi partean.
Urtero legez, hainbat izan dira hara oinez joan diren herritarrak, baina beste hainbat autoz ere hurbildu dira. Ordurako prest zuten dena, eta 11:00etan hasi da bailarako hildakoen aldeko meza. Baselizan egin dute elizkizuna, eta hura bukatzean, atarian jan-edanaz gozatu ahal izan dute herritarrek.
Jon Maia eta Aitor Salegi bertsotan hasi dira segidan, eta bertso eta bertso artean, jolasean ibiltzeko parada izan dute gaztetxoenek. Izan ere, herri kiroletan trebatu dira horiek, ermitaren kanpoaldean izan baitute lokotx biltzen, ingudearekin nahiz harria jasotzen ibiltzeko aukera.