Urola Erdiko Mankomunitateak egokitu egin du hondakin komertzialaren biharko bilketa Azpeitian eta Zestoan, beroak horretara bultzatuta. Izan ere, tenperatura altuak iragarri dituzte biharko ere, eta Eusko Jaurlaritzaren Larrialdiei Aurre Egiteko eta Meteorologiako Zuzendaritzak alerta laranja ezarri du. Horrenbestez, aurreko egunetan ezarritako neurriekin jarraituz, aldaketak egingo dituzte hondakin bilketan bi udalerri horietan.
Azpeitian, aurreratu egin dute ordutegia, eta 09:00etan jasoko dute errefusa; Zestoan, aldiz, 19:00etara atzeratu dute zerbitzu hori: herrigunean, ontzi arinak jasoko dituzte ordu horretan, eta Arroabean, ontzi arinak zein kartoia bilduko dituzte.
Mankomunitateak langileak babesteko asmoz ezarri ohi du neurri hori, beroagatik arrisku gehien dagoen orduetan beharginak kalean ibil ez daitezen.