Eguraldi ezin hobearekin igo dira herritarrak gaur goizean Pagoetara, natura parkearen eguna ospatzera. Ehunka lagun batu ditu hitzorduak, eta jendea familia giroan zein lagunartean joan da bertara. Asmo bera zuten guztiek: naturaz gozatu eta ondo pasatzea, alegia.
Askotariko jarduerak izan dira goiz partean bertan, eta guztiak trikitilarien doinuekin zein jan-edanerako aukerarekin lagunduta izan dira. Esaterako, Aitor Iraeta Gipuzkoako Pottokazaleen Elkarteko kideak pottoken inguruko azalpenak eman ditu. Halaber, Urnietako (Gipuzkoa) Basabizi zentroan sendatutako hegazti bat erakutsi dute, eta jakitera eman dutenez, gauean askatuko dute, gaueko hegaztia baita.
Gainera, euskal makila borrokaren erakustaldia ere egin du Oiartzungo (Gipuzkoa) taldeak. Teknika hori borrokarako eta defentsarako erabiltzen zen antzinan Euskal Herrian, eta teknikaren inguruko azalpenak emateaz arduratu da Jose Inazio Ganboa Euskal Makil Jokoa elkarteko kidea.
(Argazkiak: Gorka Eizagirre eta Amaia Agote)