Eskualdeko pilota elkarteek txapelketa ugari izan ohi dituzte urte guztian zehar, baina elkarte guztien artean bereziena ez bada, berezienetako bat da Gipuzkoako Herriarteko Pilota Txapelketa. Gipuzkoako Euskal Pilota Federazioak (GEPF) atzo, asteartea, aurkeztu zuen txapelketa Donostian, eta han izan ziren lehian parte hartuko duten elkarteetako zenbait ordezkari.
Aurtengo edizioan, 24 herrik eman dute izena eskuzko txapelketarako, hamar herrik larruzko paletako zein pala motzeko modalitaterako, eta hemezortzi herrik gomazko paletako txapelketarako. Urola Kosta eskualdeari dagokionean, sei herrik eman dute: Aiak, Azkoitiak, Azpeitiak, Zarautzek, Zestoak eta Zumaiak. Eskuzkoan, Aiak, Azkoitiak, Azpeitiak eta Zestoak parte hartuko dute; erremintako txapelketan Azpeitia eta Zumaia izango dira ordezkariak; eta gomazko paleta modalitatean Azpeitiak ez, gainerako guztiek.
Txapelketa aurkeztearekin batera, modalitate bakoitzeko koadroa osatzeko kanporaketen zozketak ere egin zituzten atzoko aurkezpen ekitaldian. Hori hala, eskualdeko parte hartzaileek dagoeneko badakite beren txapelketa osatzeko bidea zein puntutan eta noren aurka hasiko duten. Gukak modalitatez modalitate jaso ditu eskualdeko ordezkariek Gipuzkoako Herriarteko Pilota Txapelketan izango duten bidea:
Eskuzko modalitatea
Aiak, Azkoitiak, Azpeitiak eta Zestoak jokatuko dute eskuzko modalitatean. Koadroaren beheko adarrean hasiko dute lehia lehen hiru herriek, eta goiko adarrean, Zestoak. Aiak Zizurkilen aurka jokatuko du final hamaseirenetako kanporaketa; Zizurkilen jokatuko dute joanekoa maiatzeko lehen asteburuan, eta Aian, itzulerakoa, hurrengo astean.
Azkoitiak, Azpeitiak eta Zestoak, bestalde, final zortzirenetan hasiko dute txapelketa; joaneko partidak etxetik kanpo jokatu beharko dituzte hiru herriek maiatzeko hirugarren asteburuan, eta etxean, itzulerakoak, astebete beranduago. Azkoitiak, Zegama-Antzuola kanporaketako irabazlea izango du aurkari; Azpeitiak, Amezketa-Lazkao kanporaketa gainditzen duena; eta Zestoak, Aduna-Oñati kanporaketako garailea.
Erreminta modalitatea
Azpeitiak eta Zumaiak jokatuko dute larruzko paleta eta pala motza uztartuko dituen modalitatean. Bi herriek final zortzirenetan hasiko dute txapelketa, maiatzaren bigarren asteburuan. Azpeitia koadroaren goiko adarrean izango da, eta Olaberriarekin neurtuko ditu indarrak; joaneko partida etxetik kanpo jokatuko dute, eta itzulerakoa, etxean. Zumaia, berriz, koadroaren beste adarrean da, eta Oiartzun izango du arerio; Zumaiakoek etxean jokatuko dute joanekoa, eta etxetik kanpo, itzulerakoa.
Gomazko paleta
Herriarteko Txapelketa barruko modalitaterik berriena da gomazko paletarena, baina, aurten, txapelketa horretan izango dute parte hartzerik handiena Urola Kostako herriek; izan ere, bost herrik eman dute izena: Aiak, Azkoitiak, Zarautzek, Zestoak eta Zumaiak. Bost herriak koadroaren beheko aldean egokitu dira, eta zenbait kanporaketetan egokituko zaie horietako zenbaiti elkarren aurka aritzea ere.
Zarautzek eta Zestoak final hamaseirenetan abiatuko dute txapelketa, indarrak elkarren aurka neurtuz. Joaneko partida Zarautzen izango da, eta itzulerakoa, Zestoan. Kanporaketa hori gainditzen duen herriak bere etxean hasiko du final zortzirenetako kanporaketa Azkoitiaren aurka. Kanporaketa Azkoitian ebatziko da, hala.
Zumaiak ere Azkoitiarekin batera ekingo dio lehiari final zortzirenetan, eta haiek Hernani-Soraluze kanporaketako irabazlea izango dute kontrario; Zumaiak ere joanekoa etxetik kanpo jokatuko du, eta itzulerakoa, etxean. Aldiz, Hernani, Soraluze edo Zumaia izango da Aiaren lehiakidea final laurdenetan; Aiakoek ere etxetik kanpo hasiko dute txapelketa, baina etxean jokatuko dute itzulerakoa.
Zesta puntarik ez
Gipuzkoako Herriarteko Txapelketaren laugarren modalitatea zesta puntarena izan ohi da, baina Gipuzkoako Euskal Pilota Federazioak jakinarazi duenez, aurten bi herrik baino ez dute eman izena. Hori horrela izanda, txapelketarik ez antolatzea erabaki du GEPFk.
Tradizioz, eskualdeko herrien artean, Zumaiak parte hartu izan du zesta puntako txapelketan. Ordea, urtez urte behera egin du modalitate horretan izena eman duten herrien kopuruak. Iaz, esaterako, Hondarribiarekin eta Mutrikurekin batera aritu zen Zumaia ligaxka erako txapelketa jokatzen, eta txapela jantzi zuen.
