Gero eta gutxiago falta da Korrikaren edizio berria abiatzeko. Hamasei egun barru, martxoaren 19an aterako da 24. Korrika Atharratzetik, eta hamar egun geroago helduko da Bilbora, hilaren 29an, Euskal Herria alderik alde zeharkatu eta gero.
Euskararen aldeko martxaren bueltan, hainbat ekitaldi eta ekintza egingo dira, Korrika kulturalaren aterpean. Hala, martxoaren 27an bertso afaria egingo dute Arroabean, 21:00etan hasita, auzoko Ederki elkartean. Bertsotan, Unai Iturriaga eta Jon Maia arituko dira.
Afariko menua honakoa izango da: piper beteak, txipiroiak tintan, txahal saiheskia, postrea eta kafea. Prezioa, 25 euro izango da.
Bertso afarirako txartelak dagoeneko salgai daude Arroabeko Txara dendan, eta bihartik aurrera eskuragarri izango dira Zestoako Portalen eta Zumaiako Inpernupen.