Aiako lurretan aurkitzen den, eta Orioko Gainaren azpitik igarotzen den Zudugaraiko trenaren tunela indartzeko lanak abiatuko ditu bihar Euskal Trenbide Sareak. 740 metroko luzera duen tunelaren zati bat indartuko dute urriaren 4ra arte luzatuko diren lan horien bidez. Horrek eragina izango du Donostiako Amara eta Bilboko Matiko arteko trenean, zati bat autobusez egin beharko denez.
Konkretuki, Zarauzko San Pelaio eta Aia-Orio geltokien arteko bidea egingo dute autobusez, tren zerbitzua bi geltoki horien artean etengo dutelako. Aurrekontua, autobus zerbitzua barne, milioi bat eurokoa dela iragarri du Euskal Trenbide Sareak, eta amaitze data egun bat aurreratu dutela, urriaren 5ean Elgoibarren egingo duten Kilometroak dela eta tren zerbitzu bereziak eskaini ahal izateko.