Euskalgintzaren Kontseiluak deituta, Arabako, Bizkaiko eta Gipuzkoako 200dik gora alkate eta hautetsi nahiz euskalgintzako ordezkari Bilbon, EAEko Auzitegi Nagusiaren atarian, elkartu dira gaur goizean. Euskararen aurkako azken epaiari erantzun bateratua eman diote horiek; izan ere, Voxen helegite bat berretsi eta Udal Legea hizkuntza arloan arautzen duen dekretuko hainbat artikulu baliogabetu zituen lehengo astean Espainiako Auzitegi Gorenak.
Hitzorduan izan dira eskualdeko alkate hainbat, hala nola Ana Azkoitia Azkoitikoa, Nagore Alkorta Azpeitikoa, Koldo Arzallus Errezilgoa, Mikel Arregi Zestoakoa, Mari Karmen Arregi Aizarnazabalgoa, Haritz Alberdi Getariakoa nahiz Jon Ander Azpiroz Aiakoa. Udal horietako hainbat zinegotzik ere parte hartu dute agerraldian; besteak beste, han izan dira Irune Urbieta Zarauzko zinegotzi eta UEMAko lehendakariordea, Ainara Landa eta Garazi Olaizola Zarauzko zinegotziak, Izaro Zinkunegi Errezilgo zinegotzia, Mari Jose Arregi Azkoitiko Euskara zinegotzia, Nerea Goiria Zumaiako Euskara eta Hezkuntza zinegotzia zein Aitor Larrañaga Azpeitiko Euskara batzordeburua. Horiez gain, deialdiarekin bat egin dute UEMAko, Eudeleko, Gipuzkoako Foru Aldundiko nahiz Euskalgintzaren Kontseiluko kideek ere; tartean, Noemi Ostolaza Emakundeko idazkari nagusia eta Orioko zinegotzia.
Idurre Eskisabel Euskalgintzaren Kontseiluko idazkari nagusiak hartu du hitza agerraldian, eta hark salatu du epaiak erabat hausten duela azken hamarkadetako kontsentsua eta nabarmen kaltetzen duela autogobernua. "Euskal gizartearen eta euskal erakundeen gehiengo zabalaren borondate demokratikoaren aurkako eraso zuzena da", haren hitzetan.
Euskara hizkuntza gutxitua izanik, egoera "oso larria" dela ere esan du, eta gogora ekarri du, Udal Legeaz gain, euskal erakundeen hizkuntza politika egiteko eskumena higatu dutela beste 30 sententziak. Horri guztiari "batasunetik" erantzun behar zaiola uste du Eskisabelek, eta adierazi du "aurrera egiteko garaia" dela. "Horretarako segurtasun juridikoa indartu behar da eta beharrezko legeak aldatu", gaineratu du.
Halaber, gaurkoan, euskararen erabilerak dagokion lekua har dezan "beharrezkoak diren neurriak sustatzeko konpromisoa" hartzen dutela gaur Bilbon elkartu diren hautetsiek eta ordezkariek. "Euskara behar dugu, eta euskarak behar gaitu", esan du hark.