Lan hitzarmen berria eskatzen mobilizazioak abiatu dituzte adinekoen egoitzetan. ELA sindikatuak sei greba egun deitu ditu Gipuzkoako egoitzetan. Atzo izan zuten lehena, eta Donostian egin zuten mobilizazioak. LABek, bere aldetik, lau orduko lanuztea egin zuen atzo, eta Donostian mobilizatu zen.
Gaur, grebako bigarren egunean, Zumaiara ekarri du protesta ELA sindikatuak. Eguerdi partean Eusebio Gurrutxaga plazan elkarretaratu dira Urola Kostako egoitzetako beharginak. Bertan izan dira Zumaiako San Juan egoitzako, Otezuri zentroko eta eguneko zentroko langileak, Zarauzko eguneko zentrokoak, Zestoako Gisasola egoitzakoak, Azpeitiko San Martin egoitzakoak eta Azkoitiko San Jose egoitzakoak. Ordu laurdenez kontzentratu dira plazan.
Arratsaldez egingo dute bigarren kontzentrazioa, kasu horretan, Saregile plazan 18:30ean hasita.