Gipuzkoako Herri Txikietako Areto Futbol Kopa abiatzear da. Liga amaitu eta gero, apirilaren 11n, ostiralez, hasiko dute aurtengo kopa txapelketa. Bi mailatan banatuko dute lehia, eta bakoitzean launa taldek parte hartuko dute. A mailan jokatuko dute Bidania-Goiatz, Itziar, Leaburu-Txaramako Uzturre eta Ikaztegietako Kutturru taldeek, eta, aldiz, B mailan ariko dira Itsasondoko Ijitok, Ikaztegieta, Errezil eta Arroa Behea taldeak. Itzuli bateko ligaxka jokatuko dute, eta onenek lortuko dute kopa txapelketan aurrera egitea.
Apirilaren 11n jokatuko den lehen jardunaldian, A mailan, Itziar eta Bidania Goiatz ariko dira lehian batetik, eta bestetik, Leaburu-Txaramako Uzturre Ikaztegietako Kutturruren aurka. B mailan, berriz, Ikaztegietak eta Errezilek jokatuko dute partida bat, eta Itsasondoko Ijitok eta Arroa Behea taldeek, bestea.
Partidak apirilean eta maiatzean zehar jokatuko dituzte, eta talde onenek ekainaren 7an jokatuko dituzten finaletara sailkatzea lortuko dute. Hain justu, aurten Bidania-Goiazko pilotalekuan jokatuko dituzte kopako finalak. Antolatzaileek adierazi dutenez, egun guztiko festa egiteko asmoz antolatuko dute egun hori eta herri afari batekin borobilduko dute jaia.
Emakumeak, lehen aldiz
Aurten, aurrenekoz, emakumeek ere parte hartuko dute Gipuzkoako Herri Txikietako Areto Futbol Kopan. Hain justu, Urola Kosta eskualdea ordezkatuko duten bi taldetan, Aizarnazabal eta Arroa Behea taldeetan, eman dute izena lehen aldiz emakumeek. Nolanahi ere, oraindik eman daiteke txapelketarako izena, epea apirilaren 12ra arte egongo baita zabalik.
Gipuzkoako Herri Txikietako Areto Futbol Kopa da, areto futbolari dagokionez, Gipuzkoan jokatuko den emakumeen lehiaketa ofizial bakarra, Gipuzkoako Futbol Federazioak ezin izan baitu aurten emakumeen txapelketarik antolatu talde faltagatik. Dena den, Gipuzkoako Areto Futbol Elkarteak lortu du hori, eta haien arabera, "oso garrantzitsua" da lorpena, elkarteak aurtengo urterako zehaztutako "erronka nagusietako bat" izan baita hori.