Portugaleteko XIII. Traineru Jaitsieran lehiatu ziren asteburuan Orioko, Zumaiako eta Zarauzko traineruak. Guztira 47 ontzik parte hartu zuten hainbat kategoritan. Eskualdekoei dagokienez, ZAEko seniorren trainerua uretaratu zen gizonezkoen mailan; Oriori dagokionez, arraunketa elkarteko emakume seniorren trainerua lehiatu zen, baita Badok13 taldeko beteranoen trainerua ere; eta Zumaiako klubari dagokionez, emakume seniorren eta gizonezkoen traineruak lehiatu ziren.
Senior emakumeek eta beteranoek 4.000 metroko distantzia burutu zuten, eta senior gizonek eta gazte/mistoek, 5.500 metro.
Hori horrela, Zarauzko gizonezkoek hirugarren postua eskuratu zuten beren kategorian, 18:20,88 denborarekin. Taldearen aurretik sailkatu ziren Zierbena, lehenengo postuan, eta Pedreña, aldiz, bigarrengoan.
Orioko arraunlariek asteburu bikaina izan zuten. Badok13 traineruak lehenengo postua eskuratu zuten beteranoen mailan, 12:20,79 denborarekin. Emakumezkoen kategorian, aldiz, 12:43,45 denborarekin amaitu zuten arraunketa elkarteko arraunlariek, 4.000 metroko distantzia egin ostean.
Zumaiako arraunlariek ere emaitza onak lortu zituzten. Emakumezkoak Orioren atzean kokatu ziren, 12:49,35 denborarekin bigarren postua eskuratuz. Gizonezkoek, aldiz, bosgarren postua lortu zuten, 18:29,25 marka egin ostean.