Artearen hazia ereiteko asmoz, ArtHaziak ikus-entzunezko saioa estreinatu zuen Gukak Pazko Astean, eta orain, Gabonetako oporraldian, berriz heldu dio proiektuari. Eskulanen saioa da ArtHaziak, Mireia Galarza Bastidak aurkezten du, eta bost saiotan, bost eskulan egingo ditu, urratsez urrats eta modu errazean.
Abenduaren 26ko eta 27ko lehen bi atalen ostean, Gabonetako oporraldirako prestatutako hirugarren atala izango da gaurkoa, eta urtarrilaren 2an eta 3an ikusi ahal izango dira azken biak Guka Telebistan, 11:00etan, eta baita Gukaren webgune guztietan ere. Gainera, webguneetan atal berezia izango du ArtHaziak-ek, eta atal horretan, saioa nahieran ikusteko aukeraz gain, beste hainbat denbora-pasa ere egongo dira eskuragai.
