Erlo Guka Telebistak Urrutira joan gabe saioaren hirugarren denboraldiko laugarren atala eskaini zuen atzo, asteazkena. Azkoitiko herrigunetik Aizpurutxo auzora arteko bidegorrian zehar egin zuten ibilbidea Mireia Galarza kazetariak eta Kepa Alberdi historia zaleak. Hain justu, Urolako trenak garai batean egiten zuen bidea osatu zuten bi lagunek, eta Galarzak trenaren garai bateko historiak ezagutu zituen Alberdiren ahotik.
Atzo Erlo Guka Telebistan eskaini ondotik, gaur, osteguna, Urolako Komunikazio Taldeak (UKT) ikusgai jarri du saioa eskualdeko bere tokiko hedabide guztietan. Urrutira joan gabe saioaren beste bi atal eskainiko ditu UKTk datozen bi asteazkenetan, 21:00etan hasita, Erlo Guka Telebistan. Dena den, ostegunean, UKTren webgune guztietan ikusi ahal izango da saioa.