Atzean gelditu dira San Pedro festak, eta orain, denborak eskaintzen duen lasaitasunarekin, balorazioa egiteko ordua da. Festa batzordeak bilerara deitu du biharko, asteazkena, 19:00etan, Kultur Etxean. Festa Batzordean eta jaien antolakuntzan parte hartu duten herritar, elkarte eta eragile guztiak daude bilerara gonbidatuta.
Helburua izango da aurtengo jaiak elkarrekin baloratzea, ondo egindakoak jaso eta hobetu beharrekoak identifikatzeko. Horrez gain, festa batzordearen berrantolaketari buruzko bileretan adostu bezala, San Nikolas jaietarako musika taldeen proposamenak biltzen hasiko dira bileran.