Balearen Egunerko kultur programaren lehen hitzordua atzo arratsaldean eskaini zen Kultur Etxean Mar Mar Teatro konpainiaren eskutik. Arrainak bihotzean antzezlanaz gozatzeko aukera izan zuten etxeko txikienek.
Gaur 19:00etan, berriz, Errio dokumentala ikusteko aukera egongo da bertan, eta ez da sarrerarik eskuratu behar bertaratzeko.
Ibon Gaztañazpi kazetari oriotarrak zuzendutako ikus-entzunezkoak Orioko itsas ondarea jasotzen du, eta horretarako, errioaren historia eta istorioak kontatzen ditu Nagore Urdapilleta Orio Arraunketa Elkarteko arraunlariak. Hainbat gairi buruz hausnartzen du lanak, galdera batzuk planteatuz. Esaterako: nolatan lehiatu zuen Oria bezalako ibai koxkor batek Rin, Tamesis, Sena, Guadalquivir eta Europako beste ibai garrantzitsuenekin XVI. mendetik aurrera?...