Atzo agurtu zuen Getxo Folk jaialdiak Muxikebarriko oholtza, eta amaiera ezinhobea eman zioten aurtengo edizioari Benito Lertxundiren omenez sortutako emanaldiarekin.
Hunkidura kuttunak ikuskizunarekin omendu zuten oriotarra, "bidaia emozional bat" proposatzen duen emanaldiarekin, hain zuzen ere. Arkaitz Hormaetxe eta Kukai dantza konpainiako kideak arduratu ziren musikariari omenaldia eskaintzeaz, eta bertaratu ziren ikusle guztien laguntzarekin, "gau errepikaezina" bizi zuten atzo iluntzean. Asko izan ziren oholtza gainetik igaro ziren musikariak, besteak beste, Mikel Markez aiarra, Mirua eta Gatibu taldeetako kideak, Idoia Surmendi eta Janus Lester.
Jaialdiko antolatzaileek, Lertxundi eta bertaratutako guztiei esker ona adierazteko asmoz, hurrengo mezua partekatu dute sare sozialen bitartez: "Orioko Bardoaren kanta ezagunenen eskutik hunkitzeko aukera izan dugu, gure oroimenaren zati bereizezina den musikaz gozatzen. Mila esker, Benito!".