Irungo harizko orkestrak, Oiasso Kameratak, Getaria bisitatuko du igande honetan, azaroko lehen egunean. 12:30ean hasita, Bizitzaren harian kontzertua eskainiko du Salbatore Deuna elizan, eta joan nahi dutenentzat sarrera librea izango da.
Lehengo eta gaur egungo euskal konpositoreen obrak aurkeztuko dituzte oholtzan, Aitzol Iturriagagoitia biolin jotzailea eta Amaia Iturriagagoitia eta Irati Juan abeslari gazteen laguntzarekin. Tomas Ruti zuzendariaren gidaritzapean izango dira guztiak.