Urteko azken hilabetera gerturatu ahala, euskaldun eta euskaltzaleentzat urteko hitzordu garrantzitsuena ere ari da gerturatzen: Euskararen Nazioarteko Eguna. Abenduaren 3a da, datorren asteazkena, eta Getarian jakinarazi dute egun horren bueltan zer egitarau egongo den aurten.
Batetik, Iturzaeta Herri Eskolako ikasleak arduratuko dira Euskararen Egunari merezitako tokia emateaz. Egunean bertan izango da hori. Baina herriko beste eragile batzuek ere antolatu dituzte ekintzak, Getariako Gazte Asanbladak eta herriko abesbatzak, hain justu.
Honakoa da aurtengo egitaraua:
Abenduak 3, asteazkena, Euskararen Nazioarteko Eguna
- 15:15. Kalejira, Iturzaeta Herri Eskolatik plazara, adin guztietako ikasleekin.
- 15:30. Ekitaldiaren hasiera, plazan. LH 6. mailakoek bertsoak abestuko dituzte, eta hainbat abesti kantatuko dituzte. Dantza saioa ere egingo dute, Gora Euskara abestiarekin.
- 17:30. Ai, Zapotxin! Baratxuri zoparen sekretua ikuskizuna, plazan.
Abenduak 5,ostirala
- 21:00. Bertso afaria gaztetxean Libe Goenaga, Danel Olano, Amets Aizpuru eta Aitor Salegi bertsolariekin. Gai jartzen, Ane Ezenerro. Antolatzailea: Getariako Gazte Asanblada (GGA).
Abenduak 6, larunbata
- 12:30. Kantujira, plazatik abiatutako, Getariako Salbatore Abesbatzako kideekin.