Musika Bandaren dianarekin esnatu da gaur Getaria, Salbatore Egunez. Abesbatzaren laguntzan meza izan da parrokian, eta tradizioari eutsiz, ohorezko aurreskua dantzatu die herritarrei gero Haritz Alberdi alkateak Gudarien enparantzan.
Txistu eta danbolinaren laguntzaz atera dira udaletxetik zinegotziak, eta beranduago alkatea bera. Txaloz erantzun dute herritarrek, eta aurreskua dantzatu ondoren, banaka-banaka agurtu ditu Alberdik arkupeetan ziren zinegotziak.
Arratsaldean jarraituko du festak. Plazan Pontx pailazoaren Denak plazara! emanaldiaz gozatzeko aukera izango dute etxeko txikienek 18:00etan hasita. Eskuz binakako emakumezkoen Salbatore txapelketako finalak ere izango dira, 18:30ean hasita, eta 19:30etik aurrera, Broken Brothers Brass Band ariko da kalez kale. Gaurko ekitaldi garrantzitsuenetarikoa 23:00etan izango da. Konpartsa, alegia. Brasilgo inauterien bueltan prestatu dute aurtengo ikuskizuna.
Atzo, argindarrik gabe
Salbatore Egunaren bezperan jai giro ederra izan zen atzo Getarian, baina parrandazaleak ezustean harrapatu zituen argindarraren matxura batek. Izan ere, 01:00etatik 03:00ak aldera argindarrik gabe geratu zen herria.
Getariako Udalaren esanetan, matxura bat izan daiteke etenaren arrazoia, baina ez dakite zehazki zerk eragin zuen itzalaldia. Dena den, mozketak ez zuen festa giroa zapuztu, eta txarangaren erritmora luzatu zuten gaua kalean zirenek.