Euskaraldiko egitarauaren barruan, Laburbira film laburren zirkuituko lanak proiektatzekoak ziren joan den igandean Getariako Iturzaeta aretoan. Goizaldean herrian izandako ezbehar larriaren ondoren, ordea, udalak erabaki zuen bertan behera uztea eguneko ekitaldi guztiak. Hala, apirilaren 13an, igandearekin, izango da hitzordu berria.
Emanaldia 18:30ean hasiko da, eta sarrerak aurrez erosi ahal izango dira, 3 euroan, Turismo Bulegoan. Egunean bertan aretoko leihatilan ere salgai izango dira.
Zortzi film laburrek osatuko dute aurtengo Laburbirako emanaldia. Horietako batzuk zenbait zinema jaialditan parte hartu dute nahiz sarituak izan dira, tartean Goya sarietarako hautatutako bi film –Ekain Irigorienen Europa eta Eneko Sagardoiren Betiko Gaua–; Alaia Martin bertsolariak, Karmele Mitxelena eta Iraitz Mateorekin batera zuzendu duen Pentsatzen dut; Itziar Ituño protagonista daukan Ekain Martinezen Prosopagnosia; eta Huezinema jaialdia irabazi zuen Utländsk film laburra.