Getariako Udalak 2023an jarri zuen martxan idazleek herriko ostatuetan sormen egonaldiak egiteko egitasmoa, eta hiru idazlek izan zuten horretarako aukera: Olatz Mitxelenak, Iñigo Martinezek eta Oihane Zuberoak.
Martinezi dagokionez, iazko martxoaren 10etik 15era bitartean egin zuen egonaldia, eta bertan Ezinezkoaren balioa: Bizitzaren hutsuneen inguruan bueltaka lana garatzeko aukera izan zuen. Garaiaren ideologiaren kontra, ezinezkoaren balio existentziala aldarrikatzen duen saiakera idazten aritu da gasteiztarra. Urte bat igaro ondoren, ostegun honetan aurkeztuko du egonaldi hartako fruitua, 18:30ean hasita, Zarautz jauregian.
Aurtengo edizioa
Aurtengo edizioan, aldiz, Jon Artanok, Miren Agur Meabek eta Garazi Arrulak egingo dute egonaldia Getariako ostatu banatan. Ekaitz Esteban Kultura zinegotziak azaldu du hiru idazleen lanak "sormen prozesuan" daudela, eta proiektuak aurkeztu dituzten guztiei "lagina" eskatu diela epaimahaiak aurten, "kalitateaz gain, lana aurreratuta izateari ere balioa eman nahi izan zaiolako".