Getariako Gazte Asanbladak urteko hitzordu berezienetako baten berri eman du: Getariako Bertsio Gauaren berri. Iaz bezala, aurten ere urtearen hondarrean egingo dute musika emanaldia. Izan ere, data zehaztu dute: abenduaren 14an, larunbatez, izango da aurtengo Bertsio Gaua, 22:00etatik aurrera.
Gau horretan oholtzara igo nahi dutenek bi bide dituzte parte hartzeko: batetik, Gaztetxean bertan dagoen zerrendan eman daiteke izena; bestetik, Instagram bidez jar daiteke antolatzaileekin harremanetan, –@getaikogaztetxia da kontuaren izena–. Kontzertuen egunean bertan egingo dute bilera partaideekin, 18:00etan. Bertan emango dituzte zehaztapen guztiak. Jakinarazi dute, hori bai, talde bakoitzak gehienez bost abesti jo ahalko dituela.