Eusko Label Ligako azken jardunaldia izan da gaur, Portugaleten. Hain zuzen ere, lehen txandan jokatu dute Getariak eta Oriok; Lekittarra eta Cabo izan dituzte aurkari. Hasieratik kostatu zaie getariarrei erritmoa hartzea, eta azken postuan bukatu dute bai txanda bai eta sailkapen orokorrean. Hain justu, 20:16,76 denborarekin bukatu du estropada Esperantzak. Orio ere ez da oso fin ibili, eta azken-aurreko postuarekin konformatu behar izan du. 20:10,14 denboran osatu du estropada.
Denboraldian egindako lan onaren ondorioz, ordea, Eusko Label Ligan erdialdean bukatu dute denboraldia eskualdeko bi taldeek. Hain justu ere, bosgarren geratu da Orio; eta zazpigarren Getaria.
Gainerakoan, gaurko estropadan ez da ezusterik izan eta bigarren txandan parte hartu duen Zierbenak irabazi du Portugaleteko bandera (19:22,18 denborarekin). Ligan bigarren postua finkatzeko balio izan dio garaipenak.
Urdaibai da, ordea, 2023ko Eusko Label Ligako txapelduna. Bermeoko taldea hirugarren amaitu du El Corte Ingles Banderan (19:37,50), baina atzo jokatu zen Bermeoko Ikurriñean utzi zuen erabakita liga.