Aurtengo sanmartinak azken hondarrera iritsi dira Errezilen. Bete-betea izan zuten joan den asteburua, eta haren ondoan lasaiagoa izan dute oraingo hau, baina Jubilatuen Eguna ospatu gabe ez zeukaten festak bukatutzat ematerik, eta horretan ari dira gaur.
Goizean, aurrena, ganadu erakusketa egin dute. 11:00etan hasita, herriko zazpi ganadutegitako animaliak jarri dituzte ikusgai, eta umeak zein helduak, jende ugari arrimatu da haien ingurura. Hauek dira erakusketan parte hartu duten ganadutegi: Aritzeta Goikoa, Artañola, Belamendi, Etumeta, Ezama Enea, Mugarrieta eta Txokolate. Besteak beste, ahuntzak, ardiak, behiak, idiak, zaldiak, behorrak eta moxalak izan dira ikusgai.
Eguerdian, 13:00etan hasita, meza izan da, eta ondoren, 14:30ean, Borondegin elkartu dira herriko dozenaka jubilatu, bazkariarekin borobildu baitituzte euren eguna eta aurtengo sanmartinak.