Herriko abeltzaintzaren eta baserri giroaren erakusleiho bihurtuko da igandean Errezil. Izan ere, herriko ganaduaren erakusketa egingo dute San Martin jaietako Jubilatuen Egunaren barruan. 11:00etan hasita, ondorengo zazpi ganadutegitako ganadua jarriko dute ikusgai: Aritzeta Goikoa, Artañola, Belamendi, Etumeta, Ezama Enea, Mugarrieta eta Txokolate. Hala, besteak beste, ahuntzak, ardiak, behiak, idiak, zaldiak, behorrak eta muxalak izango dira ikusgai.
Erakusketa ez ezik, bestelakorik ere izango da Jubilatuen Egunean. 13:00etan meza izango da, eta, ondoren, 14:30ean, Borondegin izango den jubilatuen bazkariarekin borobilduko dute eguna.