Zelatungo iraileko erromeriek abuztuan izan ohi dute atarikoa, motorrak berotzeko eguna: San Joan Txiki eguna. Atzo, larunbatez, ospatu zuten hitzordua, Zelatungo bi bordetan jende mordoxka bilduta. Usadioari jarraituz, trikitia izan zen nagusi Hernio mendiaren magalean, 19:00rak aldera arte. Arandia anaiak arduratu ziren San Joan Txiki eguna girotzeaz, Zelatungo erromeriei hasiera emanez. Goiz-eguerdian hasi eta afal aurrera arte iraun zuen festak, tartean bazkaria eginda.
Irailean, lau erromeria
Lau igande ditu aurten irailak, eta lau erromeria ospatuko dituzte Zelatunen: irailaren 6an, Saioa Lizarralderekin eta Maddalen Arzallusekin; irailaren 13an, Izerrekin eta Alabierrekin; irailaren 20an, Ostolazarekin eta Larrañagarekin; eta 27an, Elizagoien ahizpekin.
Bordetako arduradunek gogorarazi dute iraileko igandeetan ezingo dela Errezil aldetik autoz Zelatuneraino iritsi; Odria baserrian itxiko dute bidea. Gainerakoan, urtean zehar zabalik egoten da bidea.
(Argazkiak: Ibon Errazu)