Urtero-urtero ospatu izan dute Euskararen Eguna elkarrekin Errezilgo San Martin herri eskolakoek, Bidania-Goiatzko Txinkorta eskolakoek eta Albizturgo eskolakoek. Txandaka, urte bakoitzean herri batean. Aurten, Errezilgoei egokitu zaie festa antolatzea eta beste bi eskola txikietakoak berean hartzea.
Ekitaldiz betetako eguna izan dute hiru eskola txikietakoek. Antzerkiak egin dituzte, gero jolasean ibili dira eta bazkaltzeko herriko pilotalekuan elkartu dira. Behin bazkaldutakoan, muralak margotu dituzte eta agurtzeko elkarrekin bertso bat kantatu dute eskolaren sarreran, Errezilgo erraldoiak dantzan zirela.
Euskararen Normalkuntza Planaren barruan antolatu izan dute Euskararen Eguna hiru eskola txikiek, baina diru laguntzak murriztu zaizkiela-eta, elkarrekin egin duten azkena izan da gaur Errezilen egin dutena.