Xabier Orbegozo Arria V.a errezildarrak aspaldi esan zuen apustuak utzi egingo zituela, baina demazalea da aizkolaria, eta berriro animatu da erronka botatzera. Hain zuzen ere, atzo –igandea– jakinarazi zuen bere erronka onartuko duen norbaiten bila ari dela.
1962an Txikito de Arruitzek eta Ramon La Tasak jokatu zuten "apustu handi" hartako lan bera egitea nahi du Arria V.ak. Zehazki, 45 ontzako hamar enbor ebaki eta korrika hamar kilometro egin zituzten haiek plazan. Lan berberak egin nahi ditu errezildarrak, Tolosako (Gipuzkoa) edo Azpeitiko zezen plazan, martxoaren amaieran. 5.000-6.000 euro jokatzeko prest dago aizkolaria, eta abantaila bat eskatu dio aurkariari: egurrak berak eramatea plazara.
Urtarrilaren 5ean, Kantabrikon
Hortik aurrera, negoziatzeko prest agertu da Arria V.a, eta urtarrilaren 5ean, Errege bezperan, Tolosako Kantabrikon izango da zain, 18:00etatik 20:00etara. Erronka onartzeko prest dagoenari hara bertaratzeko deia egin dio errezildarrak.
2022ko apirilaren 24an jokatu zuen azken apustua Arria V.ak, Eneko Otañoren aurka, eta galdu egin zuen erronka. Orduan esan zuen apustuak utzi egingo zituela.