San Martin eguna izanik, festa giroan murgilduta ibili ziren atzo errezildarrak. Eguerdian meza eta hamaiketakoa egin zituzten hainbat lagunek, eta arratsaldean, berriz, umeentzako jolasak ez ezik, Errautsak hauspotzen ikus-entzunezkoaren emanaldiaz gozatu ahal izan zuten. Borondegin elkartu ziren hainbat herritar Trikigiro elkartearen dokumentala ikusteko, eta lana ikusi ondoren, elkarte horretako Haritz Garmendiak azalpenak eman zizkien han elkartutakoei.
Datozen asteburuetan egingo dituzte San Martin festetako azken ekintzak Errezilen. Igandean Jubilatuen Eguna izango da, eta mezaz gain, bazkaria egingo dute Borondegin, bertsolariekin eta trikitilariekin. Azaroaren 22an, berriz, bertso afaria izango da Letean, Sustrai Colinarekin eta Aitor Mendiluzerekin.