Errezil sanmartinetan murgilduta dago ostiral arratsaldeaz geroztik. Bihar, astelehena, izango da San Martin eguna, eta gaur, igandea, haurren lasterketarekin hasi dute eguna. Haur Hezkuntzako eta Lehen Hezkuntzako neska-mutilek jokatu dituzte lasterketak, eta eguraldi ederrak lagunduta, giro ederra sortu da haien bueltan.
Udaletxe paretik abiatu dira korrikalari txikiak, eta plazatik nahiz herri eskola ataritik igarota, irteera lekuan izan dute proba denek helmuga; han izan dituzte gurasoak eta aiton-amonak animoak eta beharrezkoa izan duten bultzada emateko; izan ere, eskolatik udaletxe aurreko plazatxora dagoen maldak zaildu die helmuga. Nolanahi ere, guztiek gustura amaitu dute proba; parte hartzaile guztientzat izan dira dominak, eta proba irabazi duten neska-mutilek garaikurra jaso dute podiumera igota. Lasterketa kontuak amaituta, haurrak ere festan murgildu dira, guztientzat hamaiketakoa eskaini dute eta.
Gaurko iragarritako jai egitarauaren lehen ekintza izan da haurren lasterketa; 14:00etan, zahagiko ardoa dastatzeko aukera izan dute herritarrek zimitorioan. Arratsaldean, berriz, herritarren arteko kirol erronka jokatuko dute plazan, 17:30an hasita. 19:00etan, berriz, pintxo poteoa egingo dute, eta segidan, bingoa jokatuko dute Borondegin. Aldiz, bihar ospatuko dute San Martin eguna, eta orduan meza, haurrentzako ekintzak eta Errautsak hauspotzen dokumentalaren emanaldia nahiz hitzaldia izango dira, Borondegin.
Hona hemen Errezilgo sanmartinak ospatzeko datozen orduetarako zein egunetarako antolatutako egitaraua:
Igandea, azaroak 10:
- 17:30. Herritarren arteko kirol erronka.
- 19:00. Pintxo poteoa. Ondoren, bingoa Borondegin.
Astelehena, azaroak 11, San Martin eguna:
- 11:00. Meza nagusia. Ondoren, hamaiketakoa Borondegin.
- 16:30. Haurrentzako ekintzak.
- 19:00. Errautsak hauspotzen dokumentalaren emanaldia eta hitzaldia, Borondegin.
Asteartea, azaroak 12, Jubilatuen eguna:
- 13:00. Meza nagusia.
- 14:00. Jubilatuen bazkaria Borondegin, bertsolariekin eta trikitilariekin.
Azaroak 22, ostirala:
- 21:00. Bertso afaria Letea jatetxean. Bertsolariak: Sustrai Colina eta Aitor Mendiluze. Trikitilariak: Erkizi eta Manex Unanue.