Eneko Otaño beizamarrak eta Iker Vicente otsagabiarrak irabazi dute 23. Ramon Latasa saria. Atzo arratsaldean jokatu zuten lehia hiru bikotek, Sunbillako (Nafarroa) frontoia jendez leporaino zela, eta hamar kanaerdiko eta 60 oinbiko sei enbor ebakitzen azkarrenak izan ziren Otaño eta Vicente.
Julen Alberdi Txikia IV.a eta Arkaitz Etxebeste nahiz Mikel Larrañaga eta Hodei Ezpeleta Bihurri II.a izan ziren lehian aritu ziren beste bi bikoteak, baina horiek ezin izan zuten txapela eskuratu. Izan ere, lanak oso ondo hasita, laugarren enborra ebakitzerako hamar segundoko aldea lortua zuten Otañok eta Vicentek. Azkenean, Larrañagari eta Bihurriri 25 segundoren aldea aterata lortu zuten txapela.